Obradoiro de debuxo na Asociación Down de Santiago de Compostela

Durante os meses de novembro e decembro realizáronse na Asociación Down de Santiago de Compostela catro obradoiros de debuxo cos nenos e nenas de sete anos. 

Nestes obradoiros participou alumnado do Grao en Mestre/a de Educación Infantil da Universidade de Santiago de Compostela coordinados por Silvia Capelo, vivindo unha experiencia similar á da Escola Infantil do Milladoiro no mes de outubro.

As seguintes fotos amosan todas as actividades que fixeron os nenos e nenas e os estupendos resultados acadados:

Obradoiros de debuxo na residencia de Volta do Castro

O pasado luns 14 de decembro de 11:30 a 12:30 h. celebrouse un obradoiro de debuxo na residencia da terceira idade de Volta do Castro. Nesta actividade participaron oito alumnos e alumnas e dúas profesoras do Grao en Mestre/a de Educación Infantil e Primaria coordinados por Silvia Capelo.

O obradoiro consistiu na creación de Parangolés, túnicas nas que cada persoa ten que representar e transmitir as súas emocións e sentimentos a través do debuxo e da imaxe. Unha vez que realizaron o parangolés puxérono e comezaron a expresarse cantando cancións. 

Foi unha experiencia moi gratificante tanto para os maiores como para os alumnos e alumnas da Facultade de Ciencias da Educación xa que lle permitiu achegarse ao entendemento da vida cotiá deste grupo de persoas e como podedes ver nas fotos pasárono estupendamente!

Concerto de Nadal na residencia Volta do Castro

O pasado martes 15 de decembro ás 17 horas celebrouse dentro deste proxecto un concerto de Nadal na residencia Volta do Castro de Santiago de Compostela. Pablo Bermúdez, Sebastián Fernández, Patricia Quintela e Antía Cores (alumnado da mención de Educación Musical e do Grao en Mestre/a de Educación Primaria) foron os encargados de encher de música esta residencia dividindo a súa actuación en dúas partes. Na primeira delas, interpretaron cancións instrumentais acompañadas nalgunha ocasión de voz e na segunda parte os catro músicos tocaron e cantaron unha selección de coñecidos vilancicos e panxoliñas coa axuda das voces dos maiores.

Esta experiencia foi moi gratificante para o alumnado de Ciencias da Educación xa que lle permitiu amosar o traballo que realizan día a día como instrumentistas e nesta ocasión nun lugar onde non están acostumados a tocar habitualmente. 

Exposición do Maratón do Debuxante na Zona C

Entre o luns 14 e o domingo 20 de decembro terá lugar na Zona C situada en San Domingos de Bonaval (Santiago de Compostela) a exposición de todas as obras creadas no Maratón do Debuxante. 

O horario de apertura de luns a sábado será de 11 a 13 h. e de 17 a 20 horas. O domingo soamente estaremos pola mañá.

Agardámosvos a todos e todas!!

Imaxes do Maratón do Debuxante de Santiago

O pasado sábado 7 de novembro asistiron cincuenta rapaces e rapazas coas súas familias ao Maratón do Debuxante celebrado na Avenida Xoán XXIII en Santiago de Compostela.

Todos os participantes pasárono moi ben e como mostra as seguintes imaxes:

Sae na prensa o Maratón do Debuxante

O xornal La Voz de Galicia publicou o pasado domingo 8 de novembro unha pequena nova sobre o Maratón do Debuxante celebrado en Santiago de Compostela. 

Vídeos do Maratón do Debuxante de Ames

O pasado 19 de setembro celebrouse en Bertamiráns o Maratón do Debuxante. A súa organizadora, Silvia Capelo, gravou estes vídeos para amosarnos algunhas das actividades que realizaron as familias que ata alí se achegaron. 

Este sábado 7 de novembro o Maratón do Debuxante será en Santiago de Compostela así que animámosvos a participar a todos e a todas!!

Imaxes do taller na Escola Infantil do Milladoiro

As seguintes fotografías dan conta do ben que o pasaron os nenos e nenas da Escola Infantil do Milladoiro durante o taller celebrado entre os días 19 e 26 de outubro!

O debuxo como medio de expresión

Entre o 19 e o 26 de outubro, 100 alumnos e alumnas da Escola Infantil do Milladoiro tiveron a oportunidade de participar nun taller que consistiu nunha práctica do debuxo como medio de expresión. Os encargados de impartilo foron 19 alumnos e alumnas do Grao de Mestre en Educación Infantil da Universidade de Santiago de Compostela coordinados por Silvia Capelo, responsable do deseño das diferentes actividades así como dos seus obxectivos.

Os futuros mestres e mestras conseguiron motivar e dinamizar a todos os nenos e nenas participantes a partir de lenzos transparentes, pelotas, pinturas e o propio corpo. 

A continuación amosámosvos algunhas fotografías para que poidades ver en que consistiu o taller.

The big draw

Enlace moi interesante para coñecer un montón de cousas sobre o Festival de Debuxo máis grande do mundo.

Maratón do debuxante

O vindeiro 7 de novembro de 16:00 a 18:00 h. terá lugar o Maratón do debuxante na Avenida de Xoán XXIII (en caso de choiva, a actividade trasladarase ao Pavillón de Vite I).







O evento enmárcase dentro da celebración internacional The Big Draw, un festival de debuxo que xurdiu no ano 2000 no Reino Unido. A idea é conectar a persoas de todas as idades a través do debuxo e baixo o lema "Drawing changes lives". Neste caso, a xornada está dirixida ás familias que poderán participar nun montón de actividades: marañas de cores, arrollar pelotas, feira de debuxos, pescadores de liñas... Son actividades lúdicas que traballan o movemento, o trazo, as liñas, as cores, etc. entendendo o debuxo dun xeito amplo e como vehículo para a transmisión das emocións.




A proposta forma parte de "Unión de Canles Sociais: proxecto de arte comunitario" financiado polo Consello Social da Universidade de Santiago de Compostela e organizado polo Departamento de Didáctica da Expresión Musical, Plástica e Corporal da Facultade de Ciencias da Educación e conta ademais coa colaboración do Concello de Santiago de Compostela.







O maratón do debuxante é unha acción coordinada por Silvia Capelo coa que colaboran un grupo de monitores e monitoras, estudantes de Grao en Mestre/a de Educación Infantil e Primaria da USC así coma profesorado do devandito departamento.







Todas as actividades serán de balde e dende aquí animamos a participar a todas as persoas interesadas, saiban debuxar ou non.